Galatians 3
A Naro ni Ramai a Vinara, a Naro ni Luhoi Tora
1Mua e huriki a bakovi a ngatavine o Galesia, mu manga! E rei i tami mua? I navai? Mu longo kaburungi pali a hini a vakalongo kavakava ne mua na matane huriki lobo, ne Isu Kristo i mate na kai tavalavala na murine mua? 2A ngaru ni nana mua vona a ninana i taku kunana. Ra Hanu Kiripiripi, mu bole navia? Mu bolea na tahuna mu ramai a vinara, o mu bolea na tahuna mu longo a Velenga Kamumu, mu luhoi torea? 3Mu manga a manga! A nilaho ne mua turane Kristo, mu vakatubua na nitora na Hanu Kiripiripi. Pali i navai? Ngane mu ngaru ni laho na nitora na kakaine mua? 4Ra maka maregoa ri bele ne mua na tahuna mu luhoi torea e Kristo, ma mu gu kaloho tavula. 5Ra Viri i habi ne mua a Hanu Kiripiripi, i rata na kurukurune mua a nivakasiri. I navai i rata mavonga? I rata a vuhuna mu ramai a vinara vona, o i rata mavonga a vuhuna mu longoa a Velenga Kamumu, mu luhoi torea? 6 aMu luhoia e Abraham. Ni here virihi e Abraham, i maea, “i luhoi torea a Vure, lakea a Vure i galea a bakovi malamala.”7I mavonga, a ngaru mu gu lohoka vona, e huriki ri luhoi torea a Vure, ria kunana e huriki a hamone Abraham muholi. 8 bHosi a Hinere i vakalongo muga a naro a Vure ta ge gale malamala e huriki i uka ma ria a Iuda, na tahuna ri luhoi torea. A Hinere i vakalongo muga a ngava nga hosi na tahuna a Vure i takia ne Abraham a Velenga Kamumu, na tahuna i ta maea, “Ne vomu kunana, ga gamai e huriki a bakovi lobo na malala.” 9Na naro iea kunana, e huriki ri luhoi torea e Kristo, a Vure ge vakabagetu ria turane Abraham, ra bakovi ni luhoi torea a Vure.
10 cA ta maea, a vuhuna e huriki ri toni ni muri mai a vinara lakea a Vure ge gale ria ri malamala, e huriki nga ni ruduraha, a vuhuna a ngava ni here hosi i maea, “E huriki i uka ma ri ramai lobo a ngava ni here na Vinara, ni gi ruduraha.” 11 dNgane i kavakava hateka, i uka tara viri ge ramai lobo a vinara, lakea a Vure ge galea a bakovi malamala, a vuhuna ni here hosi i maea, “E huriki a bakovi malamala ri gi bole a nimahuri vakaroro na tahuna ri luhoi torea a Vure.” 12 ePali a naro ni ramai a vinara i uka ma i ramai a naro ni luhoi torea a Vure, a vuhuna a ngava ni here hosi i maea, “E rei a viri i ramai a maka vinara lobo bara i mahuri.” 13 fA Vure ge ratapile vakaroro e huriki lobo i uka ma ri ramai a maka vinara lobo. Pali e Kristo i konamule hita na tahuna i bole a vuranga iea na murine hita, a vuhuna ni here hosi i maea, “E huriki ni paditata na kai, ni ruduraha.” 14I rata mavonga, lakea a ngava a Vure i vakabagetua e Abraham vona ge bele ne huriki i uka ma ria a Iuda, si gi bole a Hanu Kiripiripi, re Isu i ta muholi ge habi ne hita, na tahuna si luhoi tora ia.
A Vinara, a Nita Muholi
15Mua e huriki a turagu, ga ta vakakika vona a naro na malala. Na tahuna e huriki a bakovi ri valongo pali a ngava, i uka tara viri ge hudo tala tabu a ngava, o ge ravunu vuroki a ngava vona. 16 gHosi a Vure i habi a ngava ne Abraham rua a hamona, i ta muholi. A ngava ni here hosi i uka ma i ta maea, “ne huriki a hamomu,” i manga ri gi ala kupo. I taki a viri ala taku kunana, i ta maea, “na hamomu,” re Kristo. 17 hA pelegona nitagu i maea, hosi a Vure i ta muholi ne Abraham. Muri na pida i 430 a vinara i bele. A vinara iea i uka ma i ravunu vurokia a ngava a Vure i ta muholi ne Abraham vona, ge ratea ge bele manga a ngava tavula. 18 iBara a maki a Vure i ta muholi hosi ne Abraham ge bole, pali ngane ge bole na tahuna i ramai a vinara kunana, ngane i uka ma ge ramai a nita muholi na Vure. Pali a Vure i habi a maki ne Abraham na tahuna i ta muholi vona.19 jPali a vinara, a ra lehona? A Vure i habi a vinara, ge vakasiri kavakava a naro hale, ge vano ge harena na tahuna a hamone Abraham ge bele, ra viri a Vure i ta muholi vona. A Vure i habi a vinara iea ne huriki a agelo. E huriki a agelo nga ri habia ne Moses, ra bakovi i pesi na kurukuruna Vure, e huriki a Iuda. Lakea e Moses i habi a vinara iea ne huriki. 20Pali na tahuna a Vure i ta muholi ne Abraham, i uka ma i taki polo a ngava na bakovi tara. Ia kikeri kunana i ta turane Abraham.
21 kPali si gi ta navai ngane? A vinara i hehea a ngava a Vure i ta muholi ne Abraham vona? I uka liu! A Vure bara i habi a vinara tebi, ra ge habi a nimahuri ne hita, ngane a dala ni bele malamala na matana Vure bara i bele na naro ni ramai a vinara, i uka ma ge ramai a naro ni luhoi tora. 22Pali a Hinere i rata e huriki lobo, turana maki lobo, ni gi kolotata ria na nitora na naro hale, ne vona a Vure ge habi a maki i ta muholi vona, na tahuna e huriki ri luhoi torea e Isu Kristo.
23 lMuga na naro ni luhoi torea a Vure i uka ma i bele ma, hita lobo, i manga si made na bavi, polotano na nitora na vinara. I tubu hosi, i valai, i harena na tahuna a naro ni luhoi torea a Vure i bele kavakava. 24 mNa naro iea, a vinara i bele manga a matakari ne hita, ge tuli valai hita ne Kristo. I bele mavonga, a Vure ge gale hita si malamala na tahuna si luhoi torea e Kristo. 25Pali ngane a naro ni luhoi torea e Kristo i bele, i mavonga a vinara i uka ma i matakari tabu hita, 26 na vuhuna ngane mu bele manga e huriki a tuna Vure, a vuhuna mu luhoi torea e Isu Kristo. 27 oE rei a viri ne mua mu rihi e Kristo na naro ni vahilolo, i manga mu rodoa e Kristo, i manga a viri i rodo a varakia karaba. 28 pMua lobo mu rihi e Kristo, ngane mua lobo mu manga a viri ala taku. I uka tabu a Iuda, o a viri i uka ma a Iuda. I uka tabu a vorakato, o a viri i uka ma a vorakato. I uka tabu a bakovi o a ngatavine. Mu palupulupu. 29 qNa tahuna mua a ngate ne Kristo, mua a hamone Abraham, mu gu bole a maka maki a Vure i ta muholi hosi ne Abraham ge bole.
Copyright information for
BNP